സ്വത്വം
സ്വത്വം, സ്വത്വം എന്ന് കേള്‍ക്കാന്‍ തുടങ്ങിയിട്ട് കുറേ കാലമായി. സ്വത്വക്കാരെ സിപിഎം പുറത്താക്കിയത് കിനാലൂരില്‍ അടി കിട്ടിയപ്പോഴാണ് എന്ന് ആരോ പറഞ്ഞാണ് ഞാന്‍ അറിഞ്ഞത്. അന്ന് കുഞ്ഞഹമ്മദിക്ക കരഞ്ഞു. ഇടത്തും വലത്തും അടികിട്ടിയതിനാണ് അദ്ദേഹം കരഞ്ഞത് എന്നും പറഞ്ഞു കേട്ടു.
ശ്രീലങ്കന്‍ തമിഴര്‍
ചാനല്‍ ഫോറ് എന്നോ മറ്റോ ഒരു ചാനലുണ്ട്. അവര്‍ ശ്രീലങ്കയില്‍ നടന്ന തമിഴ് കൂട്ടക്കൊലയെ കുറിച്ച് വിശദമായി ഒരു ഡോക്യുമെന്ററി തയ്യാറാക്കിയിരുന്നു [1][2]. അതില്‍ താന്‍ ജനിച്ച് വളര്‍ന്ന ഇംഗ്ലണ്ടില്‍ നിന്ന് ജന്മനാട്ടില്‍, ശ്രീലങ്കയില്‍, സന്ദര്‍ശനത്തിനെത്തുന്ന ഒരുത്തിയുണ്ട്. അവള്‍ പറഞ്ഞത് കൂട്ടക്കുരുതിക്കിടയില്‍ പാലായനം ചെയ്യാന്‍ ശ്രമിക്കുമ്പോഴാണ് ചുറ്റും മരണപ്പെടുന്നത് 'തമിഴ'രാണ് എന്നും താന്‍ ഒരു 'തമിഴ'ത്തിയാണ് എന്നും ആദ്യമായി മനസ്സിലായത് എന്നാണ്. അതായത് അവളുടെ സ്വത്വം 'തമിഴ്' ആണ്. ആയത് ആ വിഡ്ഢി കൂശ്മാണ്ടം മനസ്സിലാക്കുന്നത് കൂട്ടക്കുരുതി നടക്കുമ്പോഴാണ്. അതിനു മുമ്പ് ഓള് തമിഴ് ആയിരുന്നില്ലേ? അല്ല, ആയിരുന്നോ? ഉവ്വോ?
ഇറാക്ക്
ഇതേ പ്രശ്നം തന്നെയാണ് ഇറാക്കിലും. തങ്ങള്‍ ഷിയയാണോ സുന്നികളാണോ കുര്‍ദ്ദുകളാണോ യാസിദികളാണോ എന്നതാണ് അവിടുത്തെ പ്രശ്നം. ഇപ്പോള്‍ പുതിയ ഒരു സുനാപ്പികള്‍ ഇറങ്ങിയിട്ടുണ്ട്: ഐ. എസ്. അഥവാ ഇസ്ലാമിക് സ്റ്റേറ്റ് [3]. ഇവന്മാര്‍ അമേരിക്ക കാശുകൊടുത്ത് വളര്‍ത്തിയ സുന്നി ഭീകര സംഘടനയായ ലവന്മാരുണ്ടല്ലോ -- അല്‍ ഖ്വയിദ. അവരില്‍ നിന്ന് അടര്‍ന്നുണ്ടായതാണ് എന്നാണ് സാക്ഷ്യം. സുന്നി മാത്രം മതി, മറ്റെല്ലാവരും സുന്നിയാവുക ഇല്ലെങ്കില്‍ ചാകാന്‍ തയ്യാറാകുക എന്നതാണ് എവരുടെ പക്ഷം. എന്താണ് ഈറ്റിങ്ങളുടെ ഹാല്ന്ന് കണ്ടറിയണം. ഏതായാലും കുറേ ഷിയാക്കളെയും കുര്‍ദ്ദുകളെയും യാസിദി ന്യൂനപക്ഷങ്ങളെയും കൊന്നൊടുക്കുന്നുണ്ട് ദിവസേന. സ്വത്വം അവിടെയും സടകുടഞ്ഞെഴുന്നേല്‍ക്കുന്നു. ഇന്ത്യയിലെ ഷിയകള്‍ക്ക് സ്വത്വബോധം മുട്ടുന്നു. ഇറാക്കിലേക്ക് ഐ. എസുമായുള്ള യുദ്ധത്തില്‍ പങ്കുചേരാന്‍ പോകണം എന്നതാണ് ഇപ്പോഴത്തെ ജീവാഭിലാഷം. സ്വത്വബോധമുള്ള ചില സുന്നികള്‍ മുമ്പേ കപ്പല്‍ കയറി ഐ. എസില്‍ ചേര്‍ന്നു കഴിഞ്ഞത്രെ!
ഗാസ
കേരളത്തിലെ പല ഇത്താത്തമാരും ഇത്തവണ പെരുന്നാളിന് മൈലാഞ്ചിയിട്ടപ്പോള്‍ ഗാസയില്‍ ഒഴുകുന്ന ഞമ്മന്റെ ആള്‍ക്കാരുടെ രക്തത്തെ കുറിച്ചാണ് ഓര്‍ത്തത്. പെരുന്നാളിന്റെ തലേ ദിവസം ഉറങ്ങാന്‍ കൂടെ കഴിഞ്ഞില്ല. എന്താ ചെയ്യ. ഇസ്രായേലിനെ പാഠം പഠിപ്പിക്കണേ, ആടെ തീമഴ പെയ്യിക്കണേ എന്നൊക്കെ പ്രാര്‍ത്ഥിക്കാം. വേറെ എന്ത്? ഹമാസ് സഹന ശക്തി ആര്‍ജ്ജിക്കുകയാണ്. ആര്‍ജ്ജിക്കട്ടെ.
ഇസ്രായേല്‍
നിങ്ങ എന്തൊക്കെ പറഞ്ഞാലും നുമ്മ ചെയ്യാനുള്ളത് ചെയ്യും. കാരണം നുമ്മ യഹൂദരാണ്. ദൈവത്താല്‍ തിരഞ്ഞെടുക്കപ്പെട്ടവര്‍. നുമ്മക്ക് ആരെയും കൊല്ലാം. അമേരിക്ക നുമ്മടെ കൂടെണ്ടാവണം എന്നു മാത്രം. യൂറോപ്യന്‍ യൂണിയന്റെ കാര്യം പറയേണ്ടതില്ലല്ലോ? ലതാണ് നുമ്മടെ ഒരു ലിത്. കാരണം നുമ്മ യഹൂദരാണ്. സ്വന്തം സ്വത്വം തനിക്ക് തന്നെ നാണക്കേടായ ചില യഹൂദരും ഉണ്ട്. ഓല് പറഞ്ഞത് ഇസ്രായേലിന്റെ കൂട്ടക്കുരുതി യഹൂദരുടെ പ്രവര്‍ത്തിയായി കാണരുത് എന്നാണ്. ഈ സ്വത്വത്തിന്റെ ഒരു കാര്യമേ. ആസനത്തില്‍ മുളച്ചാല്....
അമേരിക്ക
സദ്ദാം ഹുസൈന്‍ എന്നൊരാളുണ്ടായിരുന്നു. പഴയ ചരിത്രമാണ്. പലരും മറന്നു പോയിരിക്കുന്നു. അതുപോലെ ട്രിപ്പോളിയിലെ ഒരു മച്ചാന്‍: ഗദ്ദാഫി. പിന്നെ ബിന്‍ലാദന്‍. അങ്ങനെ ചിലര്‍. അഫ്ഗാനിസ്ഥാന് പണ്ടൊരു രാജ്യമായിരുന്നു. ഇന്നത്തെ പോലെ ഒരു വെടക്ക് സ്ഥലമായിരുന്നില്ല. ഇതെല്ലാം മാമന് തകര്‍ത്തതാണ്. എന്തിനാണെന്നോ? മാമന്റെ ഒരു ജീവിതശൈലിക്ക് ഇതെല്ലാം എതിരായിരുന്നു. അത്രതന്നെ. മാമന് മാമന്റെ സ്വത്വം തന്നെ വലുത്. വേറാള്‍ക്കാരൊക്കെ ഉണ്ടായാലെന്ത് ഇല്ലെങ്കിലെന്ത്?
ഇന്ത്യ
തള്ളെ, ഭാരതത്തെപ്പറ്റി നീ കേട്ടിട്ടില്ലേ? ഗാസ, ഇറാക്ക് എന്നൊക്കെ പറയുമ്പോള്‍ ചെല കൊമ്പന്മാര്‍ വരും -- അപ്പോ ഞി കാശ്മീര്‍ പണ്ടിറ്റുകളെ കണ്ട്ക്കാ? പാക്കിസ്ഥാനിലെ ഹിന്ദൂന്റെ കഥ ഞി കേട്ടിക്കാ? ബംഗ്ലാദേശിലെ ഹിന്ദൂനെ ഓര്‍ത്ത്ക്കാ? ഓല്‍ക്ക് വേണ്ടി അന്റെ അച്ഛന്‍ ശബ്ദമുയര്‍ത്തിക്കാ? എന്താ പറയുക? ഹിന്ദുവിനും പൊള്ളുന്നത് സ്വത്വബോധം ഉണരുമ്പോള്‍ തന്നെ. കൂടുതല്‍ ഞമ്മള് പറയണോ? വേണ്ട. ഇന്നിത്രയും മതി.
അവസാനം
സ്വത്വം എന്ന സങ്കുചിതത്വത്തില്‍ നിന്നും ഇനി മനുഷ്യരാശി എപ്പോഴാണ് ഉയരുക? മനുഷ്യന്‍ മനുഷ്യനായി, സ്വത്വത്തിനതീതമായി, ബലികഴിക്കപ്പെടുന്ന പിഞ്ചുകുഞ്ഞുകളുടെ രോദനം എന്നാണ് നമ്മുടെ കരളുകള്‍ അലിയിക്കുക? തമിഴര്‍ കൂട്ടക്കൊല ചെയ്യപ്പെട്ടപ്പോള്‍ തമിഴര്‍ മാത്രം കരഞ്ഞാല്‍, മുസ്ലിങ്ങള്‍ വേട്ടയാടപ്പെടുമ്പോള്‍ ഇത്താത്തമാര്‍ മാത്രം കരഞ്ഞാല്‍, അമേരിക്കക്ക് അമേരിക്കക്കാരന്‍ മാത്രം തുണയായാല്‍, ഹിന്ദുവിന് ഹിന്ദുമാത്രം രക്ഷകന്‍ എന്ന് പറഞ്ഞാല്‍, പിന്നെ നിങ്ങളൊക്കെ യുദ്ധം വേണ്ട, ന്യൂക്ലിയര്‍ എനര്‍ജ്ജി വേണ്ട, പ്രകൃതിയെ രക്ഷിക്കുക, മുഖ്യമന്ത്രി രാജി വെക്കുക എന്നൊക്കെ തൊള്ളയും വിളിയും കൂട്ടിയിട്ട് എന്താണ് കാര്യം മക്കളേ?
(അ)ശുഭം!
വാല്‍ക്കഷ്ണം: ഈ യഹൂദര്ന്ന് പറഞ്ഞാ എന്തന്ന് ഇങ്ങള് മനസ്സിലാക്ക്ക്കാ? പണ്ട് ഞമ്മളെ നാട്ടിന്ന് പോയ ശ്രീകൃഷ്ണന്റെ കുടുംബക്കാരായ യാദവരാണ് ലവര്. ഏദ്?
